“باڵادی شادی” چاوە

چاوەی شاعیر، فاتح شێخ، باڵادێکی نوسیوە کە پەیامەکەی گوزارشتە لە گرنگی شادی لە ژیانی مرۆڤەکانی ئێراندا. کارەکتەرەکانی ئەم بەرهەمە ئەدەبییە بە شوێن شادی دا دەگەڕێن ، چ لە ناوەوەی ئێران و چ لە هەندەراندا.
ئەم خواستی شادیە ئەگەر بۆ هەر مرۆڤێک پێویستیەکی ژیان بێت، ئەوە بۆ ملێونەها مرۆڤ کە نزیک بە نیو سەدەیە لە سایەی ڕژێمی ئیسلامی ئیران دا شادیان لێ زەوتکراوە یەکێک لە گرنگترین پێویستیەکانی بەردەوابونی مانەوە و ژیانە. ئاخر هەناسەی شادمانی لەسایەی ڕژێمێکی مەرگ دۆست و کەلتووری مەرگ دۆستی ئیسلامیدا زەحمەتە، کە خەون و خولیای شەو و ڕۆژی مرۆڤ تیایدا زیندانی کراوە.
لەم بەرهەمەی “باڵادی شادی”دا هەموو کارەکتەرەکان لە گەنج و بەتەمەن دەیانەوێ لە کەلتووری غەم و پەژارە ڕزگاریان ببێت و “چاوە” هانی هەموویان دەدات کە بیر لە شادی و ئازادی بکەنەوە.
تێبینیەکم هەیە لەسەر پچرانی بیر لە کاتی خوێندنەوەی “باڵادی شادی”دا. کاتێک سەرقاڵی کەوتنە شوێنی چیرۆکەکەین ئەم زنجیرەی بیرکردنەوەمان دەبڕێ، ئەویش بەهۆی پچرانی دێڕەکانی بە تێکەڵکردنی چەند ڕستەی زمانی ئینگلیزی، کە خوێنەر دەبێ بوەستێ و خەریکی کۆکردنەوەی مەفهومەکە بێت و زمانێکیان بۆ ئەوی تر وەرگێڕێت. ئەم تێبینیەم وەک خوێنەرێکی زمانی کوردی سەردەمە، کە باسی هەستی خۆم دەکەم لە کاتی خوێندنەوەی بابەتێکی ئەدەبی کوردیدا .
دەستی “چاوە” خۆش بۆ ئەم بەرهەمە و هیوادارم هەمیشە وەک پەیامەکەی شاد و سەرکەوتوبێت