دروشم و بەدیلی جەماوەری ڕاپەڕیو چیە؟

هەموو بەدوای دروشم و بەدیلی جەماوەری ڕاپەڕیودا دەگەڕێن، بەڵام ئەم دروشم و بەدیلە خۆی لەو هاوار و کردەوە شۆڕشگێڕانەیەدا نیشان داوە کە ئەمڕۆ گەنجان و کرێکار و فەرمانبەر و خانە نشین و خەڵکی کەم دەرامەتی کوردستان لە ناڕەزایەتی و خۆپیشاندانەکانی ئەم چەند ڕۆژەدا کوردستانی داگرتوە. ئەویش دروشمی ” نا بۆدەسەڵاتێکی ستەمکار، نابۆپەڕلەمانی کارتۆنی، نابۆ ئۆپۆزسێۆنی ساختە“یە.

دروشمی نا بۆدەسەڵاتێکی ستەمکار

خەڵک لە بێ موچەیی و هەڕەشەی مەرگ و بێکاری و نەبونی پێداویستیەکانی ژیاندا بە جێ هێڵراوە و هیچ ڕێگایەکی بۆ نەماوەتەوە جگە لە خۆپیشاندان و پەلاماردانی ئەم حکومەتە نەبێ. کەواتە دروشمی ئێمە لاچونی ئەم حکومەتەی حزبەکانە.

سوتاندنی بارەگای ئەم حزبانە ئەو پەیامەی گەیاندوە کە دوای ٣٠ ساڵ خەڵک بڕیاری داوە کە ئەم حکومەتەمان ناوێت و دەبێ لە دەسەڵاتدا لابچێ.

بەدیلی جەماوەری ڕاپەڕیو دژ بە دامودەزگاکانی ئەم سیستمە ئابوری و سیاسی و سەربازیەی ئێستای کوردستان و دروستبونی هێزیکی تر لە دەرەوەی ئەم سیستمە دەسەڵاتدارەی ئێستا و دامودەزگا سیاسیەکانی و حزب و پەرلەمانەکەی. ئەو بەدیلەی ئەو بەدوایدا دەگەڕێین کە داواکاریەکانمان بۆ بەدی بێنێ ئەوە تەنیا هێزی جەماوەری خۆمانە، نەک هێزێکی سیاسی دەرەوەی ئێمە. هەربۆیە ئەم چینە کەم دەرامەتانە لە کرێکاران، فەرمانبەران، مامۆستایان و لاوان و خانەنشینان و هتد .. لە تەجروبەی خۆمانەوە دەزانین کە دابینکردنی موچە و خزمەتگوزاری و دامەزراندن و ئازادی سیاسی لە ڕێگای ئەم حزب و پەرلەمان و ئۆپۆزسیۆنانەوە دابین نابێ،  کەواتە بە ناچاری ئەبێ هێزی ڕیکخراوی خۆمان بێتە مەیدان و فشار بهێنێ بۆ دابینکردنی ئەم پێداویستیە سەرەتاییانەی ژیانمان.

ئێمە دەبێ حکومەتێکی سێبەری خۆمان دروست بکەین و فشاری بەردەوام بخاتە سەر دەسەڵاتی حزبەکان بۆ نەهێشتنی دەسەڵاتیان بەسەر داهات و ژیان و گوزەرانماندا. ئێمە وەک ئەم دەستە ناڕازیانەی خەڵک لەم سیستمە ناڕازین. بەدیلی ئێمە بۆ ئەم حکومەت و بەڕیوەبەرەبردنە  ئەوەیە کە داوای هەڵبژاردنی هەموو بەڕیوەبەر و بەرپرسانی شار و دامودەزگاکان و وەزیرەکان و سەرۆکی حکومەت بکەن و لەم ڕێگەیەوە نوێنەرانی خۆیان بخەنە جێگای نوێنەرانی دەسەڵات.

دروشمی نا بۆ پەرلەمانی کارتۆنی

ئەم دروشمە ئاکامی تەجروبەی شکت خواردوی١٠ ساڵی ڕابردووی خەڵکە لە کوردستان بە ئومێد بەستن بەوەی ئەم پەرلەمانە و ئۆپۆزسیۆن ئەم سیستمەی بۆ بگۆڕێ. بەڵام دەرکەوت کە مەسەلەکە تەنیا ڕیژەی کورسیەکانی یەکێتی و پارتی نیە، بەڵکو دەورێکە کە پەرلەمان لەم سیستمە سیاسی وئابووریەی یەکێتی و پارتیدا هەیەتی.ئەم پەرلەمانە خەریکی سازکردنی ئەو یاسایانەیە کە سیاسەتی ئابوری و بەرژەوەندی سیاسی و دەسەڵاتی سەرکوتی ئەم دوو حزبە  پێویستیەتی و هەر حزبێکی تری وەک گۆڕان و ئیسلامیەکان و نەوەی نوێ تەنها دەتوانن لەژێر سایەی ئەم سیاسەت و یاسایانەدا داوای بەشێ خۆیان بکەن.

بەدیلی ئێمە بۆ پەرلەمان لێپرسینەوەی جەماوەریە لەم دەسەڵاتە و دامودەزگاکانی. ئەم هەنگاوانە دەتوانێ بەرەو چاودێری جەماوەری بچێ تاکو لەم ڕێگایەوە خەڵک بتوانن لەم دامودەزگایانە بپرسنەوە و فشارێکی بەردەوام بن لەسەر ئەم حکومەت و دەسەڵاتە. چاودێری جەماوەری دروشمێکە کە دەتوانێ هێزی ناڕازی ئێستا لە هەموو دامودەزگا و لە ناو مەیدانەکانی ناڕەزایەتیەکاندا کۆبکاتەوە و ئاراستەی بکات بەرەو ئەوەی ناڕەزایەتیەکان ڕیکخراو بکا. دروستکردنی دەستەی چاودێری جەماوەری لە هەموو ئاستێکی لۆکاڵ لە شار و شارۆچکەکان و لە فەرمانگە و کارگە و نەخۆشخانە و خوێندگاکان دەتوانێ حکومەتێکی سێبەر دروست بکا و فشاری بەردەوام بخاتە سەر دەسەڵات بۆ جێبەجێکردنی داواکاریەکان.

دروشمی نابۆ ئۆپۆزسێۆنی ساختە

ئێمە بە تەجروبە بۆمان دەرکەوتوە کە حزبە ئۆپۆزسیۆنەکانی ئێستا بەشێکن لەو سیستمە سیاسی و ئابوریەی زاڵە. ئەگەر لە جیاتی بنەماڵە حزبێکی مەدەنی و لە جیاتی وەزیرە حزبیەکان تەکنۆکراتەکان حکومەت بەڕیوە بەرن هیچ لە بەرنامەی حکومەت و چۆنیەتی دابەشکردنی موچە و خزمەتگوزارە گشتیەکان ناگۆڕێ و هەموویان لەسەر ئەو بەرنامە نیولیبرالیەی هەژارترکردنی هەژارەکان کۆکن و بە کردەوە پیادەیان کردوە لە کاتێکدا بەشێک بوون لە دەسەڵات یان ئەگەر ببنە بەشێک لەو دەسەڵاتە. هەرچۆن بینیمان کە وەزیرەکانی گۆڕان و ئیسلامیەکان لە پیش یەکێتی و پارتیەوە بوون بۆ سەپاندنی پاشەکەوتی موچە.

هەربۆیە خەڵک گەیشتۆتە ئەو جێگایەی کە بەدوای بەدیلێکی تردا دەگەڕێ لەدەرەوەی ئۆپۆزسیۆنی بورژوازی و پەرلەمان. ئەمە هەنگاوێکە بەرەو پێشەوە لە ناڕەزایەتیەکانی ئێستا.

ئۆپۆزسیۆنی ڕاستەقینەی ئەم ‌هەنگاوەیە کە لە ئێستادا خەڵکی کرێکار و فەرمانبەر و کەم دەرامەت لە هەموو شوێنێکدا چاودێربن بەسەر حکومەتی هەرێمەوە و لە هەر دزیەک لە نەوتدا دەیکا، لەهەر سەرکوتێک لەبەرامبەر خۆپیشاندەراندا دەیکا، لەهەر پڕۆژەیەکی کەرتی تایبەت کە لە بودجەی گشتی دەیدزێ، لەهەر نەدان و بڕینێکی موچەدا، لە هەر دروستکردنی بۆرد و ڕیکخراوەیەکی جەماوەری بۆ تەنگ هەڵچنین و لابردنی بەڕیوەبەر و بەڕیوەبەری گشتی و وەزیر و کابینەی حکومەت و سەرۆکی حکومەتدا،دەتوانێ خۆی وەک حکومەتی سێبەر خۆی نیشان بدا واتە وەک ئەو دەسەڵاتەی بەرامبەر بە دامودەزگا فەرمیەکانی حکومەت وەستاوە و ڕێگری لێ دەکا و فشاری دەخاتە سەر تا کاتێک کە دەتوانێ و ئامادەیە کە ئەم دەسەڵات وسیستمە بە یەکجاری و بەشێوەیەکی شۆڕشگێڕانە بگۆڕێ.

ئەمانە هەرکامیان ڕێگای جێبەجێکردنی ئەو دروشمی “نا” یەیە کە بۆ دەسەڵات و پەرلەمان و ئۆپۆزسیۆن بەرزکراوەتەوە و نیشاندانی بونی بەدیل و ئەلتەرناتیڤی جەماوەری ناڕازیە لە بەرامبەر دەسەڵات و دامودەزگاکانی ئێستادا. بەدیلی سیاسی و ئابوری و ئیداری خەڵکی کرێکار و فەرمانبەر و کەم دەرامەت لەم هەنگاوانەدا دەست پێدەکا کە لە هەموو شوێنێک دژی ئەو بەرژەوەندی و سیاسەتانەی دەسەڵات دەوەستنەوە و ڕێگای پێ نادەن کە ژیان و بەرژەوەندی ٪٩٩ خەڵکی کوردستان دەکاتە قوربانی کەڵەکەی سەرمایە و پاوانکردنی دەسەڵات لای ١٪ کۆمەڵگە. ئەمە ڕێگای گۆڕینی هاوسەنگی هێزە لە نیوان خەڵک و دەسەڵاتدا و دابینکردنی ئەو داواکاریانەمانە کە ٣٠ ساڵە بەڕووی دەسەڵاتدا بۆ کار و موچە و ئازادی بەرزمان کردۆتەوە و لەم شەڕانەی سەر شەقامەکاندا کار بۆ سەپاندنی دەکەین بەسەر دەسەڵاتدا.

ئاسۆکمال

٩ دیسەمبەری ٢٠٢٠